أوقرانيا، روسيه وتوركيه (مقالەلر مجموعەسى)/روس اوقرایناسیا
ظهور ایندیکی دقیقەدن اعتباراً اوقراينا دولتی احداثی نامنەاولارق بوتون اوقراینا سیاسی جریانلرینی برلشدیريجی «اوقراينانك خلاصكار جمعیتی» وجوده كتيريلمشدر. اوقراينا ملتنك سربستجه انکشاف مدنیسی یولنی آچوب تميزلەيەجك اولان بو برنجی طوپوزك، روس چارلغنك قفاسنەایندیریلدیکی زمان، اوقراينا بويوك سوزينى سويله مكده كجيكميه جكدر.
روسیه اوقرايناسنك مركزى اوقراينا أيالتارينى شامل و جامع اولان اراضی اصلیه سی ٥١٠,٠٠٠ کیلومتر و مر بعده اولوب آوستريا حدودندن شرقه طوغری (دون) نهرینه قدر وقرەدکردن شمال استقامتنده (پريپەت) ایرماغه قدر اوزانمقدەدر، اوقرايناللرك ساکن اولدقلرى تكميل قطعاتك وسعت مجموعەسی ٨٥٠,٠٠٠ کلومترو مربعنه رسیده اولمقدەدر.
اوقراينـانك چکردەکی حکمنده اولان بالاده مذکور اراضی اصليه، طبيعةً وتاريخاً اوچ اساسلى قسمه آييرلمقدەدر. بوقسملرك برنجیسی (دنیەپەر) نهرينك ساحل يميننده كائن يرلردن متشكلدركه بونلر وضعيت جغرافیلری اقتضاسنجه شرقدن جنوب غربی يه طوغری متمايل ومتوجهدر. بو حوالی داخلنده (کيەف)، (پودولی)، (وولهينا) ودها یکی تشکیل اولنان (خولم) ایالتلرى موجوددر. ایکنجی قسم (دنیەپەر) نهرينك ساحل يسارنده واقعدركه بوقسم (پولتاوا)، (چەرنيهوف) و(خارقوف) أيالتلريني احتوا ايدر. اوچنجی قسم قرەدكز حوالی ساحلیەسنده بوانان جسیم اووەلردن عبارتدركه بونده (قاتەرينوسلاو)، (خرسون) و (طوريد) أيالتلرى موجوددر.
بوتون بواراضیده ساکن اهالينك مقدار مجموعی (خولم) ایالتی داخلی حساب ايدلمامك شرطيله – ١٨٩٧ده وقوع بولان تحرير نفوسه نظراً ٢٣,٤٣٠,٤٠٧یه بالغ اولمقده درکه ١٧,٠٠٥,٦٨٨ی اوقرايناليدر. شو حسابه کوره اوقراینالیلر ١٨٩٧ده اوقراینا اراضی اصلیه سندەکی سكنەنك يوزده یتمش ایکیسنی تشکیل ایتمکده ایدی. بوقطعه اهالیسی ١٩١٠ ده تقريباً ٢٢,٠٠٠,٠٠٠سی اوقراینالی اولمق اوزره ٣٠,٣٦٠,٠٠٠ رادەسنده ایدی.
بوندن ماعدا اوقرايناليلر زیرده تعداد ایدەجکمز ايالتلرده و قطعەلرده نفوسك اكثريتنى يامهم بر قسمنی تشکیل ایتمکدەدرلر: (قورسق)، (وورونەژ)، (دون)، (استاوروپول)، (قوبان)، (تەرەك)، (بسارابيا) و سائره. (وولغا) نهری اوزرنده کائن (سامارا) ايالتيله قفقاسياده اوقراینالی جماعتاری واردر. سبرياده اوقراینالیلر سائر اقوامه نسبة اكثريتى حائز بولنيورلر. ١٨٩٧ تحریر نتیجەسنده بوتون روسیەده يكرمی بدی میلیون اوقراينالی مقیم اولديغى آكلاشيلدى. شیمدی ایسه اوقرايناليلرك مقدار مجموعی اوتوز ميليون قدردر.
اوقراينا اراضى اصليەسنك تقسيمات اداریەسیله بواراضیده هانكی قومدن نەمقدارده سکنه موجود اولدیغی آتی يه درج ایتديكمز حدولده موضحاً كوسترلمکدەدر:
| اسامى ايالات | كيلومتر مربعى حسابيله مساحۀ سطحيەلرى | نفوسك مقدار مجموعى | اوقراينالير | بيوك روسيلر | موسويلر | پولونياليلر | آلمانلر | سائره |
|---|---|---|---|---|---|---|---|---|
| پولتاوا چەرنيهوف خارقوف | ٥٠,٠٠٠ ٥٢,٠٠٠ ٥٤,٠٠٠ | ٢,٧٧٨,١٥١ ٢,٢٩٧,٨٥٤ ٢,٤٩٢,٣١٦ | ٢,٥٨٣,١٣٣ ١,٥٢٦,٠٧٢ ٢,٠٠٩,٤١١ | ٧٤,٢٨٥ ٤٩٥,٩٦٣ ٤٥١,١٩٤ | ١١٠,٣٥٢ ١١٣,٧٨٧ | ١٦,٠٣٧ | ١٥١,٤٦٥ | |
| دنيەپەرك ساحل يسارنده كى اوقراينا ايچون مجموع | ١٥٦,٠٠٠ | ٧,٥٦٨,٣٢١ | ٦,١١٨,٨١٦ | ١,٠٢١,٤٤٢ | ٢٢٤,١٣٩ | ١٦,٠٣٧ | ١٥١,٤٦٥ | |
| كيەف وولهينيا پودوليا | ٥١,٠٠٠ ٦٩,٠٠٠ ٤٢,٠٠٠ | ٣,٥٥٩,٢٢٩ ٢,٩٨٩,٤٨٢ ٣,٠١٨,٢٩٩ | ٢,٨١٩,١٤٥ ٢,٠٩٥,٥٧٩ ٢,٤٤٢,٨١٩ | ٢١٥,٨١٦ ١٠٨,٦٨٣ ٩٩,٨١٨ | ٤٣٠,٤٨٩ ٣٩٤,٧٧٤ ٣٦٩,٣٠٦ | ٦٨,٧٩١ ١٨٤,١٦١ ٦٩,١٥٦ | ١٧١,٣٣١ | ٢٧,٦٧٠ ٢٦,٧٦٤ |
| دنيەپەرك ساحل يمينندەكى اوقراينا ايچون مجموع | ١٦٢,٠٠٠ | ٩,٥٦٧,٠١٠ | ٧,٣٥٧,٥٤٣ | ٤٢٤,٣١٧ | ١,١٩٤,٥٦٩ | ٣٢٢,١٠٨ | ١٧١,٣٣١ | ٥٤,٤٣٤ |
| قاتەرينوسلاف خرسون طوريد | ٦٢,٠٠٠ ٧٠,٠٠٠ ٦٠,٠٠٠ | ٢,١١٣,٦٧٤ ٢,٧٣٣,٦١٢ ١,٤٤٧,٧٩٠ | ١,٤٥٦,٣٦٩ ١٤٦٢,٠٣٩ ٦١١,١٢١ | ٣٧٩,٠٢٦ ٥٩٨,٣٣٣ ٤١٤,٠٨٩ | ٩٩,١٥٢ ٣٣٢,٥٣٧ ٥٥,٤١٨ | ٣٠,٨٩٤ | ٨٠,٩٧٩ ١٢٣,٤٥٣ ٧٨,٣٠٥ | ٦٥,٩٩٣ ١٧٢,٩٠٣ ٢٥٦,١٦٢ |
| بيوك اووەدن متشكل اوقراينا قسمى | ١٩٢,٠٠٠ | ٦,٢٩٥,٠٧٦ | ٣,٥٢٩,٥٢٩ | ١,٣٩١,٤٤٨ | ٤٨٧,١٠٧ | ٣٠,٨٩٤ | ٢٨٢,٧٣٧ | ٤٩٥,٤٩٢ |
| دنيەپەرك ساحل يمينندەكى اوقراينا واووەلى اوقراينا ايچون مجموع | ٣٥٤,٠٠٠ | ١٥,٨٦٢,٠٨٦ | ١٠,٨٨٧,٠٧٢ | ١,٨١٥,٧٦٥ | ١,٦٨١,٦٧٦ | ٣٥٣,٠٠٢ | ٤٥٤,٠٦٨ | ٥٤٩,٤٩٢ |
| بوتون روس اوقراينا - سنك اراضى اصيلەسى | ٥١٠,٠٠٠ | ٢٣,٤٣٠,٤٠٧ | ١٧,٠٠٥,٦٨٨ | ٢,٨٧٣,٢٠٧ | ١,٩٠٥,٨١٥ | ٣٥٣,٠٠٢ | ٤٧٠,١٠٥ | ٧٠٠,٩٥٧ |
بالادەکی جدولده يكان يكان كوستريلن اقوامدن بشقه «سائره» خانەسنده مقدارلری طوپدن ارائه اولنان آتیدەکی اقوام مختلفه اوقراينانك اراضی اصلیه سنده متمكن بولنيور:
(چەرنيهوف) ايالتنك قسم شماليسنده ١٥١,٤٦٥ بیاض روس؛ (وولهينيا) ايالتده ٢٧,٦٧٠ چه؛ (پودولى) ايالتنده ٢٦,٧٦٤ و (خرسون) ايالتنده ١٤٧,٢١٨ رومەن؛ (خرسـون) ایالتنده ٢٥,٦٨٥ و (طوريد) ايالتنده ٤١,٢٦٠ بولغار؛ اوودلى اوقرایناده ٦٦,٧٨٤ روم - یونان؛ (قاتەرينوسلاو) ایالتنده ١٧,٢٥٣ تاتار.
استاتستيق جدولنك تدقيقندن آكلاشيله جغى وجهله (دنیەپەر) نهرينك صاغ ياقەسنده كائن اوقراينا اراضیسی اووەلی اوقراینا داخل و (خولم) ايالتى خارج اولمق اوزره ٣٥٤,٠٠٠ كيلو مترو مربعی وسعتندەدر. بو اراضی داخلنده ١٨٩٧ ده تقریباً اون آلتی ميليونى نفوس بولنمقده ایدی که اون بر میلیونی اوقرايناليدر. ديمك كه اوقرايناليلر او طرفده عموم نفوسك يوزده آلتمش سکسزینی تشکیل ايدييورلر. اليوم بوحواليدەيکرمی میلیون قدر اهالی اقامت ایتمکدەدر.
در سعادتی تحت تملك و حاكميتنه آلمق خصوصنده کی خیالپرستانه تصورلرندن طولانی روسیه، در سعادت و چناق قلعه بوغازلرينك حارسی و محافظی اولان توركيەنك ارثی و ابدی دشمنی اولدی. روسیه، اسلاو منافعنی صیانت ايتمك كى دساس بر بهانه آلتنده